Meri College Journey

 Ek Gaon Ki Ladki Ka Badlav Bhara Safar

Main ek chhote se gaon se hoon jahan par ladkiyon ka college jaana koi aam baat nahi thi. Hamare gaon mein sirf ek ladki thi jo college gayi thi, jinke paas main tuition padhti thi. Vo hamare gaon ki pehli ladki thi jo college tak pahunchi thi. Unhe dekh kar hi mere sapne bade hue.

Mere kuch doston ke saath mere ghar walon ne decide kiya ki hum sab ek saath ek bade mix (girls + boys) college mein admission lein. Mere ek dost ke papa ne mere papa se baat ki aur mere papa ko mujh par hamesha bharosa tha. Papa ne mujhe bhi pucha ki kya main us bade college mein jaana chahti hoon? Lekin gaon ke logo aur padose ke react karne ka tareeka dekh kar main thoda ghabra gayi aur decide kiya ki main ek girls college hi jaungi.

Papa ne kaha ki jo tujhe theek lage tu vo kar. Aur phir main aur mere 2 best friends ek girls college mein chale gaye.

"Hum teen dost, naye college ke canteen me apne sapno ko jeete hue – yaadgar din jo zindagi bhar yaad rahenge."

College Life Ki Masti

Mujhe us waqt ye nahi pata tha ki ye college ka safar sirf kuch hi din ka hoga. Ham teeno dost college mein milkar badi masti karte the. Kabhi canteen mein jaate, kabhi college ke har kone mein ghoomte rehte. Hamare group ke aage poore college mein humari hi chali chalti thi. Hum canteen ke permanent customer ban gaye the, canteen wale uncle bhi hume ache se pehchanne lage the.

Lekin kuch mahine baad ek twist aa gaya.

College Change Karna Pada

Roz college jaana mushkil ho gaya kyunki girls college ka rule bahut strict tha aur family circumstances bhi badal gaye the. Mere ek dost ne to bade wale mix college mein transfer le liya, jabki main aur meri best friend ne external mode mein admission le liya.

BCA Ka Safar

External admission ke bawajood hum kabhi kabhi college jaate rehte the. Jab college badla to course bhi badla. Pehle main BA kar rahi thi, lekin naye college mein maine BCA select kar liya. Bina soche samjhe bas itna socha ki ghar se kaam karne ke options milenge.

Jab padhaai shuru hui tab pata chala ki BCA itna bhi aasaan nahi hai! Lekin ab rasta chuna tha to chalna to tha hi. Isme maine apni best friend ko bhi saath le liya tha. Jab usse dikkat hoti to kehti – “Tune hi fasaya mujhe BCA mein!”

Lekin sach to yeh hai ki hum dono ne mil kar hi ye decision liya tha. Sir ne bhi kaha tha – “BCA external ke liye nahi hai.” Par ab karna tha to karna tha.

Teen Saal Ka Safar

Teen saal kaise nikal gaye pata hi nahi chala. Beech beech mein failures bhi mile, challenges bhi aaye, par himmat nahi haari. Aakhir mein hum dono ache numbers se pass ho gaye.

Sabse zyada mushkil waqt aaya jab final year ka project banana tha. Tab samajh aaya ki college ka asli tension kya hota hai.

College Life Ki Yaadein

Mere liye asli college life wahi kuch din the jab main girls college mein apni best friends ke saath enjoy karti thi. Uske baad ka safar ek zimmedari wala safar tha jo kabhi aasan to kabhi kathin raha.

Par haan, ek baat zarur kahungi – "School ke din alag hote hain aur college ke din alag."

Conclusion

Aaj jab peeche mudh kar dekhti hoon to lagta hai ki woh college ke din meri zindagi ka ek anmol hissa the. Unhi dino ne mujhe strong banaya aur aage badhne ka hosla diya.



"Agar aapko meri kahani pasand aayi ho to comment karke zaroor batayein, aur apni journey bhi share karein!"

Meri Study Journey – Ghar Se Career Tak

Meri Study Journey

Main ek chote se gaon se belong karti hoon,

jahan padayi ka mahol ladkiyon ke liye hamesha se mushkil raha hai. Main ek joint family me rehti hoon, jahan 25 log ek sath rahte hain. Itne bade parivaar me padhna, sapne dekhna aur un sapno ko pura karna itna asaan nahi tha.

Jab maine apni 10th class complete ki, tab parivaar ke logon ne kehna shuru kar diya tha ki "ab bus, itna kaafi hai, ladki hai, kya karegi zyada padh ke." Lekin mere papa mere saath khade rahe. Unhone mujh par bharosa kiya aur kaha ki "padhai jaari rakh." Papa ke is ek faisle ne meri zindagi badal di.

Mujhe yaad hai, jab main 10th me thi to beech me ek baar gir gayi thi aur mujhe ek mahine tak padhai se door rehna pada. Par mere papa ka kehna tha ki "tu exam degi." Main nahi dena chahti thi, dar gayi thi, roti thi, par papa ka sapna tha mujhe padhai me aage badhte dekhna. Unhi ke liye maine exam diya aur pass ho gayi.

Jab maine 12th pass ki to log kehne lage, "ab to bahut badi baat hai,

 ladki ne 12th tak padhai kar li." Gaon ke logon ki soch thi ki ladkiyon ko sirf ghar ka kaam hi karna chahiye, lekin mere papa ki soch alag thi. Unhone hamesha kaha, "padhegi to aage badegi."

Aur aaj main apne ghar ki pehli ladki hoon jo college ja rahi hai. Na meri ghar ki kisi beti ne, na kisi bahu ne itna padha hai. Yeh sirf mere papa ke support ki wajah se ho paya hai.

Mujhe yaad hai jab main exam ke din tension me hoti thi, to mere aas paas ke log kehte the, "kya karegi itna pad ke? Aakhir me to shaadi kar ke ghar ka kaam hi karegi." Main kabhi kabhi roti thi, kabhi haar bhi maan leti thi mann hi mann me. Lekin jab bhi papa ka chehra yaad aata tha, unka bharosa yaad aata tha, to main khud ko mazboot karti thi.

Papa ke support ne mujhe yeh sikha diya ki zindagi me padhna sirf ek naukri ke liye nahi hota, balki apne sapne poore karne ke liye hota hai. Aaj main apne career me aage badhne ki koshish kar rahi hoon,

 freelancing ka safar shuru kiya hai aur apni pehchan banane me lagi hoon. Mera ek sapna hai ki ek din ghar baith kar itna kamaoon ki papa ko mujh par garv ho.

Yeh journey asaan nahi thi, lekin aaj jo bhi hoon, jo bhi ban rahi hoon, wo sirf mere papa ke bharose aur himmat ke wajah se hai.

Mujhe pata hai ki kai ladkiyan aaj bhi mere jaise sapne dekh rahi hongi, lekin unhe darr hai logon ke taano ka, family pressure ka. Main un sab ladkiyon ko yahi kehna chahti hoon – agar ek insaan bhi tumhare saath ho, jaise mere papa mere saath the, to tum duniya ki har mushkil paar kar sakti ho.

Aakhir me bas itna kehna chahungi – padhna zaruri hai, 

sapne zaruri hai, aur apne sapno ko sach karna aur bhi zaruri hai.